ჰარი პოტერის სამყარო უსასრულოდ მრავალფეროვანი და მომნუსხველია. იგი ყველაზე თავგამოდებულ პოტერჰედსაც კი აოცებს ახალ-ახალი ჯადოსნური დეტალებით, თეორიებით, ფაქტებითა თუ ისტორიებით სხვადასხვა პერსონაჟებსა, სკოლებსა თუ ჯადოქრობაზე. დარწმუნებულები ვართ ჰოგვორტსის მსგავსად ჯადოქრობის ბევრ სკოლაზეც გსმენიათ სხვადასხვა ისტორიები, მაგრამ საკმარისი ინფორმაცია ვერ მიგიღიათ.
ამ სტატიით გაგაცნობთ ჯადოქრობის სამყაროში ყველაზე ცნობილ სკოლებს, რომლებმაც ბევრი სახელგანთქმული ჯადოქარი გამოზარდა.
ბობატონი
ბობატონის ჯადოქრობის აკადემია მდებარეობს სამხრეთ საფრანგეთში, პირენეში. სახელის ეტიმოლოგია მომდინარეობს ფრანგული სიტყვიტან- “beaux” და “baton”, რაც ქართულად მშვენიერ ჯოხს ნიშნავს. ბობატონის შენობა ძველი ფრანგული სტილის შატოა, რომელიც გარშემორტყმულია ულამაზესი ბაღებით და შადრევნებით. ბობატონის ცნობილი იყო საკუთარი კვლევებით ალქიმიის შესახებ, მისი ულამაზესი შენობაც სწორედ ბობატონის წარმატებულმა ალქიმიკოსებმა ააშენეს. სკოლის დირექტორი მადამ ოლიმპე მაქსიმი გახლავთ. ბობატონის გერბზე ორი ოქროს ჯოხის კვეთა გამოსახული, რომლებზეც სამი ვარსკვლავია. გერბი ყვითელ და მწვანე ფერებშია.
ბობატონის აკადემიაში მთელი ევროპიდან ჩადიოდნენ სტუდენტები სასწავლებლად. რაოდენობრივად, სტუდენტების რაოდენობა ჰოგვორტსისას აღემატებოდა. თუ ისინი ბ.უ.ა- ს გამოცდებს ჩააბარებდნენ 6 წლის ნაცვლად 5 წელი უწევდათ სწავლა.
ბობატონი დაამთავრეს ისეთმა ცნობილმა ჯადოქრებმა, როგორებიც არიან: ნიკოლას ფლამელი, პერენელ ფლამელი, ფლერ დელაკური, გაბრიელ დელაკური და სხვები.
დურმსტრანგი
დურმსტრანგი ერთ დროს ჯადოქრების სამყაროში ერთ-ერთ ყველაზე ბნელი რეპუტაციის მქონე სკოლად მიიჩნეოდა და არცთუ უსამართლოდ. საკუთარი ისტორიის განმავლობაში, დურმსტრანგი ორჯერ ჩავარდა საეჭვო მიზნებისა და მისწრაფებების მქონე ჯადოქრის ხელში.
პირველად ეს მოხდა მაშინ, როდესაც სკოლის დირექტორი გახდა ჰარფანგ მიუნტერი, დურმსტრანგის ლეგენდარული ბულგარელი დამფუძნებლის ნერიდა ვულჩანოვას ბურუსით მოცული უეცარი გარდაცვალების შედეგად. სწორედ მიუნტერის მმართველობის პერიოდში დაიმკვიდრა დურმსტრანგმა ბნელი რეპუტაცია, რადგან მიუნტერი განსაკუთრებულად დიდ ყურადღებას აქცევდა ორთაბრძოლის ტექნიკისა და შელოცვების შესწავლას (ეს საგნები დურმსტრანგის კურიკულუმში დღემდე მნიშვნელოვან ნაწილს იკავებს). მანვე აკრძალა წმინდასისხლიანების გარდა სხვაგვარი წარმომავლობის ჯადოქრის მიღება.
მეორედ, დურმსტრანგის საეჭვო მესვეურების ხელში გადასვლა მოხდა მაშინ, როდესაც სკოლის დირექტორად იგორ კარკაროვი, საქვეყნოდ ცნობილი სიკვდილის მხვრელი დაინიშნა. ბევრმა მშობელმა საკუთარი შვილისთვის სკოლის შეცვლაც კი გადაწყვიტა ამ ფაქტის გამო. როდესაც ვოლდემორი დაბრუნდა, კარკაროვმა დატოვა სკოლის დირექტორის პოსტი და სიკვდილის მხვრელობას დაუბრუნდა.
ავადსახსენებელი მასწავლებელის გარდა, დურმსტრანგს გამოუზრდია ავადსახსენებელი მოსწავლეებიც. ერთ-ერთი ასეთი მე-20 საუკუნის ყველაზე ძლიერი ბნელი ჯადოქარი გელერტ გრინდელვალდია.
მიუხედავად ბნელი წარსულია, შეგვიძლია ვთქვათ, რომ დურმსტრანგს ამჟამად აღორძინების პერიოდი უდგას და ახალმა დირექტორმა მნიშვნელოვანი რეფორმები გაატარა. შედეგად, დურმსტრანგის კურსდამთავრებულებს შორის გამოჩნდნენ ისეთი ცნობილი ჯადოქრებიც, როგორიც არის ქვიდიჩის ვარსკვლავი ვიქტორ კრამი.
მიიჩნევა, რომ დურმსტრანგი ევროპის ჩრდილოეთ ნაწილში მდებარეობს, უფრო ზუსტი ადგილმდებარეობა ჰარფანგ მიუნტერის განკარგულების შესაბამისად მკაცრ საიდუმლოდ რჩება.
ვაგადუ
ვაგადუ არის ჯადოქართა სკოლა, რომელიც მდებარეობს მთვარის მთებში, დასავლეთ უგანდაში. ვაგადუ 1000 წელზე მეტი წლის წინ დაარსდა. იგი პირდაპირ მთვარის მთების ფერდობებში არის ნაკვეთი. აფრიკაში ჯადოქრობის 11 სკოლიდან, იგი ყველაზე დიდია, რომელიც იღებს სტუდენტებს მთელი აფრიკიდან.
ვაგადუ ცნობილი არის იმ ფაქტით, რომ ამ სკოლაში სტუდენტებს შელოცვების კეთებას ჯადოსნური ჯოხების გარეშე, ხელის ჟესტიკულაციით ასწავლიან. ჯადოსნური ჯოხები ევროპელების გამოგონებაა და აფრიკელები დიდად ვერ ხედავენ მისი გამოყენების საჭიროებას.
ჰოგვორტსისგან განსხვავებით, ვაგადუში მოხვედრილ მოსწავლეებს, წერილი არ მისდით. მათ ძილში ესიზმრებათ სკოლის დირექტორი, რომელიც მათ ქვას აწვდის. გაღვიძებულებს, ეს ქვა უკვე ხელში უჭირავთ, რომელსაც ზედ ეწერა, რომ ისინი მიღებულნი არიან ვაგადუს ჯადოქრობისა და ჯადოქრების სკოლაში.
მაჰუტოკორო
ამ უძველეს იაპონურ სკოლას ყველაზე ცოტა სტუდენტი ჰყავს სხვა თერთმეტი ჯადოქრობის სკოლასთან შედარებით. მაჰუტოკორო მოსწავლეებს 7 წლის ასაკიდან იღებს. სკოლის დახვეწილი და უხვი დეკორით გაფორმებული სასახლე აშენებულია თეთრი ფერის ნეფრიტისაგან და დგას “დაუსახლებელი” (ან ასე ფიქრობენ მაგლები) ვულკანური კუნძულის “მინამი ივო ჯიმას” ზედა წერტილზე.
სტუდენტები,ჩასვლისთანავე, საჩუქრად იღებენ შელოცვილ მოსასხამებს, რომელიც სტუდენტების გაზრდასთან ერთად დიდდება და ფერს იცვლის იმის მიხედვით, თუ როგორ სწავლობს იგი. თავიდან, მანტიები არის ვარდისფერი (ყველაზე სუსტი ფერი) და თუ ყველა ჯადოსნურ საგანში აიღებენ უმაღლეს შეფასებას, მანტიები ოქროსფერი ხდება. იმ შემთხვევაში თუ სამოსი თეთრი გახდება, ეს მიანიშნებს იმის, რომ სტუდენტმა დაარღვია საიდუმლოების საერთაშორისო დებულება და მან გათქვა ჯადოქართა არსებობა მაგლებთან. “გათეთრება” ყველაზე დიდი სირცხვილია სკოლაში, რასაც თან ახლავს ამ სტუდენტის მაჰუტოკოროს სკოლიდან გარიცხვა და იაპონიის მაგიის სამინისტროში სასამართლო პროცესის აღძვრა.
მაჰუტოკოროს სკოლა აგრეთვე ძალიან ცნობილია საკუთარი ქვიდიჩის ნაკრებითაც, რომელიც ლეგენდის თანახმად, იაპონიაში საუკუნეების წინ თავზეხელაღებულმა ჰოგვორტსის სტუდენტებმა შეიტანეს, რომლებმაც ქვიდიჩის ცოცხებით მსოფლიოს გარშემო შემოფრენა გადაწყვიტეს. მაჰუტოკოროს ქვიდიჩის ნაკრებს ტოიოჰაში ჰქვია და იგი არაერთხელ გამხდარა ქვიდიჩის მსოფლიო თასის მფლობელი. ტოიოჰაშის წევრები საკმაოდ რთულ ვარჯიშებს გადიან სანამ ქვიდიჩის მოედანზე დაიშვებიან- მათ უწევთ იაპონიის აბობოქრებულ ოკეანეში ცოცხზე ბალანსის შენარჩუნება და ამავდროულად მაგლურ თვითმფრინავებთანაც გამკლავება, რომლებიც ამერიკის მიმართულებით ზედ მათ თავზე დაფრინავენ.
კოლდოვსტორეცი
რუსული ჯადოქრობის სკოლა, რომელიც რეგისტრირებულია ჯადოქრების საერთაშორისო კონფედერაციაში. კოლდოვსტორეცის მოსწავლეები თამაშობდნენ ქვიდიჩის ვერსიას, სადაც ისინი ცოცხის ნაცვლად, ამოძირკვულ ხეებით დაფრინავდნენ.
ილვერმორნი
ილვერმორნის ამერიკული ჯადოქრობის სკოლა მდებარეობს მასაჩუსეტში, გრეილოკის მთაზე. იგი იღებს სტუდენტებს მთელი ჩრდილოეთ ამერიკიდან.
ილვერმორნი დააარსეს ირლანდიელმა იმიგრანტებმა- იზოლტ საიერმა და მისმა არაჯადოქარმა მეუღლემ- ჯეიმს სტიუარდმა 1627 წელს, ჰოგვორტსის დაარსებიდან 637 წლის შემდეგ. თავდაპირველად სკოლა წყვილის საცხოვრებელი სახლი იყო რომელიც საიერმა და მისმა მეუღლემ საკუთარი ხელით ააშენეს. ისინი თვითონვე ასწავლიდნენ საკუთარ შვილებს მაგიას. დედა და მამა მასწავლებლები, ხოლო ნაშვილები შვილები- ჩედვიკი და ვებსტერი მოსწავლეები იყვნენ. ოჯახის ოთხივე წევრმა დააარსა თითო კლუბი, რომლებთაც შემდეგი სახელები ეწოდათ:
1. სანდერბერდი- დააარსა ჩედვიკმა, უპირატესობას ანიჭებს ავანტიურისტებს. სანდერბერდში მოხვედრილი იყო პომპერტინა გოლდშტაინი.
2. ვამპუსი- დააარსა ვებსტერმა, უპირატესობას ანიჭებს მეომრებს. ვამპუსში მოხვედრილი იყო ვებსტერ ბუტი.
3.ჰორნდ სერპენტი- დააარსა იზოლტმა, უპირატესობას ანიჭებს მეცნიერებას. ჰორნდ სერპენტში მოხვედრილი იყო სერაფინა პიკერი.
4. ფაქვიჯი- დააარსა ჯეიმსმა, უპირატესობას ანიჭებს მკურნალებს. ფაქვიჯიში მოხვედრილი იყო ქუინი გოლდშტაინი.
ილვერმორნის კლუბებში განაწილება, ჰოგვორტსისგან განსხვავებით, ხდებოდა პატარა წრიულ დარბაზში, რომელიც იყო ჩაბნელებული. დარბაზის გარშემო სკოლის ოთხივე კლუბის მასკოტების ხის ქანდაკებები იდგა. სტუდენტი დგებოდა დარბაზის ცენტრში და მასკოტების ქანდაგებები ნიშანს იძლეოდნენ, რომელ კლუბში სურდათ მისი წაყვანა. ჰორნდ სერპენტის მასკოტის შუბლში არსებული მწვანე კრისტალი აბრდღვიალდებოდა, თუ ახალწვეულის თავისთან წაყვანა ჰორნ სერპენტს სურდა, ვამპუსის ქანდაკება ღრიალს იწყებდა, სანდერბერდი ფრთებს მოიქნევდა, ფაქვიჯი კი ისრებს ჰაერში გაისროდა.
ილვემორნის სკოლის ფორმა ლურჯი და შინდისფერი იყო. სხვადასხვა კლუბების შესაბამისად, განსხვავდებოდა შესაბამისი კლუბის ნაქარგობა მანტიის მკერდზე. ყველა მანტია ოქროსფერი ბროშით იკვრებოდა.
კასტელობრუქსო
კასტელობრუქსო ბრაზილიური ჯადოქრობისა და ჯადოქრების სკოლა იყო, რომელიც სტუდენტებს მთელი სამხრეთ ამერიკიდან იღებდა.
კასტელობრუქსო ამაზონის შუა ჯუნგლებში მდებარეობს. შენობა ინკების ტაძარს მოგაგონებთ. ჰოგვორტსის მსგავსად, მაგლისთვის კასტელობრუქსო საშიში ნანგრევი იქნება.
კასტელობრუქსო ცნობილია, როგორც მსოფლიოში საუკეთესო ჰერბოლოგიისა და მაგიზოოლოგიის სკოლა.
სკოლის უნიფორმა მწვანეა ყვითელი ზოლებით, რომელიც ლურჯ ფერშია გაწყობილი.