ვფიქრობთ, ბევრი ბავშვი ოცნებობს ისწავლოს იმ სკოლაში, სადაც ჰარი პოტერი, ჰერმიონ გრეინჯერი და რონ უიზლი სწავლობდნენ. რეალურ ცხოვრებაში გადმოიტანონ წარმოსახვითი და ჯადოქრული ნივთები და თავიანთი ინტერპრეტაციით განასახიერონ თავიანთი საყვარელი პერსონაჟები ან თუნდაც იმ ზღაპარში იცხოვრონ, რასაც ჯადოქრობისა და მაგიის სამყარო ჰქვია.
დარწმუნებული ვარ, ყველა პოტერჰედმა იცის ამ სამი საუკეთესო მეგობრის სკოლის სახელი და ისტორია.
ჰოგვორტსის მაგიისა და ჯადოქრობის სკოლა მდებარეობს ბრიტანეთში, კერძოდ, შოტლანდიაში, სახელიდან გამომდინარე ყველა მიხვდება, რომ სკოლაში მაგია ისწავლება. ჰოგვორტსი დაარსდა 990 წელს, იმ დროის ყველაზე ძლიერი ჯადოქრების მიერ. ესენი იყვნენ: როენა რეივენქლო, ჰელგა ჰაპლეპაფი, სალაზარ სლიზერინი და გოდრიკ გრიფინდორი.
ჰოგვორტსის ციხე-კოშკი მდებარეობს მთებში, მასთან ახლოს კი არის ტბა. სკოლის ზუსტი მდებარეობა უცნობია, რადგან იგი დაფარულია ძალიან ძლიერი შელოცვებით. ციხეკოშკის დამცველ შელოცვებში შედის აპარაციის აღმკვეთი შელოცვა და მაგლების საწინააღმდეგო შელოცვა. მაგლებისთვის, ჰოგვორტსი დანგრეულ სასახლედ გამოჩნდებოდა, რომელსაც გამაფრთხილებელი ნიშანიც კი აქვს გამოკრული- “სახიფათოა”. მაგლური ელექტრონული საგნები სკოლაში და მის ახლომახლო არ მუშაობს, რადგან ჰაერში ზედმეტად ბევრი მაგია ტრიალებს.
სასწავლო წლის ნებისმიერ დროს სკოლაში დაახლოებით 1000 სტუდენტი სწავლობს, რომლებიც 7 წლის განმავლობაში ეუფლებიან მაგიას.
ჰოგვორტსის სკოლას ლათინური დევიზი აქვს- Draco Dormiens Nunquam Titillandus“, რაც ქართულად ნიშნავს შემდეგ- არასოდეს მოუღიტინო მძინარე დრაკონს.
🦅როენა რეივენქლო-ჰოგვორტსის ერთ-ერთი დამაარსებელია. მის საპატივსაცემოდ ეწოდა ერთ-ერთ კლუბს “რეივენქლო”, რომლის სიმბოლოა არწივი ლურჯ და ბრინჯაოსფერ ფონზე. როენა რეივენქლო ადამიანში აფასებდა სიბრძნეს, აზროვნებასა და იუმორის გრძნობას, სწორედ ამ კრიტერიუმებით არჩევდა იგი თავის მოსწავლეებს. ლეგენდის თანახმად როენას ჰქონდა დიადება , რომელიც მას სიბრძნეს მატებდა და რომელიც საბოლოოდ დაიკარგა.
როენას გარდაცვალებიდან საუკუნეებია გასული, მაგრამ მისი ქალიშვილის- ჰელენა რეივენქლოს მოჩვენება დღემდე დაიარება ჰოგვორტსის კედლებში. მას მეტსახელად რუხ ქალბატონსაც უწოდებენ.
🦝ჰელგა ჰაპლეპაფი-ჰოგვორტსის მეორე დამაარსებელია. ჰაპლეპაფის სიმბოლოა მაჩვი შავ და ყვითელ ფონზე. ჰელგა ხალხში აფასებდა ლოიალურობას, პატიოსნებას, შეუპოვრობას. ის შესანიშნავად ფლობდა კულინარიას. მრავალი კერძი, რომელიც ჰოგვორტსში მზადდებოდა, სწორედ მისი რეცეპტებით იყო მომზადებული. ჰაპლეპაფის მოჩვენებაა მსუქანი ბერი.
🐍სალაზარ სლიზერინი-ჰოგვორტსის მესამე დამაარსებელია. სლიზერინის ფაკულტეტის სიმბოლო არის გველი მწვანე და შავ ფონზე. სალაზარი ფლობდა პარსულ ენას, რაც იმას ნიშნავს, რომ მას შეეძლო გველების ენაზე საუბარი. სალაზარი ხალხში აფასებდა ცბიერებას და ძალაუფლებისადმი სიყვარულს.
სალაზარ სლიზერინის აზრით, ჰოგვორტსში მხოლოდ წმინდასისხლიანებს უნდა ესწავლათ, რის გამოც უთანხმოება მოუვიდა სკოლის დანარჩენ დამაარსებლებთან და სკოლა დატოვა განრისხებულმა, თუმცა წასვლამდე ჰოგვორტსში მან საიდუმლო ოთახი შექმნა, სადაც საზარელი მონსტრი- ბასილისკო დამალა. ბასილისკოს მოვალეობა მაგლური წარმოშობის ჯადოქრების დახოცვა იყო. ოთახის პოვნა ბევრმა ჯადოქარმა სცადა, მაგრამ წინასწარმეტყველების მიხედვით, ამას მხოლოდ სლიზერინის მემკვიდრე, გველის ენის მცოდნე შეძლებდა.
🦁გოდრიკ გრიფინდორი- ჰოგვორტსის მეოთხე დამაარსებელია. ცხოვრობდა დაახლოებით 1000 წლის წინ. გრიფინდორის კლუბის სიმბოლოა ოქროსფერი ლომი წიგელ ფონზე. ის ხალხში ყველაზე მეტად აფასებდა სიმამაცეს და თავდადებას.
ჰოგვორტსში დაისვა კითხვა, თუ ვინ გაანაწილებდა სტუდენტებს გრიფინდორის, სლიზერინის, რეივენქლოს, ჰაპლეპაფის სიკვდილის შემდეგ.ეს პრობლემა გრიფინდორმა მოაგვარა. მან მოაჯადოვა თავისი ძველი ქუდი, ისე , რომ ის ჰოგვორტსის დამაარსებელივით საზღვრავდა თუ რომელ კლუბში უნდა გაემწესებინა მოსწავლე. ეს ქუდი დღემდე შემორჩა ჰოგვორტსში და მას "გამანაწილებელ ქუდს" უწოდებენ. გრიფინდორის მოჩვენებაა თითქმის უთავო ნიკი.
ჰოგვორტსის სკოლას ლათინური დევიზი აქვს- Draco Dormiens Nunquam Titillandus“, რაც ქართულად ნიშნავს შემდეგ- არასდროს მოუღიტინო მძინარე დრაკონს.