მე-16 საუკუნეში, პორტუგალიის მეფემ, მანუელ I-მა, გადაწყვიტა აეშენებინა დიდებული ზაფხულის პავილიონი სამეფო ოჯახის წევრებისთვის. ამისათვის მან ყველაზე ნიჭიერ მუშახელს მიმართა, რომელთა შესაძლებლობებიც სამეფო ოჯახს შეეფერებოდა. თუმცა, მშენებლობის დაწყებამდე მანუელ I გარდაიცვალა.
მოთამაშეების მიზანია დაბრუნდნენ პორტუგალიაში და ააშენონ პავილიონი, რომლის მშენებლობაც არ დაწყებულა. მოთამაშემ უნდა გამოიყენოს თავისი შესაძლებლობები, რათა სამეფო ოჯახის შესაფერისი პავილიონი ააშენოს.
მოთამაშეებს ურიგდებათ დაფები. ისინი დაფაზე ქულების მაჩვენებელს 5 ქულაზე აყენებენ.
მაგიდაზე იდება ფილები, რომელთა რაოდენობა მოთამაშეთა რაოდენობაზეა დამოკიდებული : 2 მოთამაშეზე 5 ფილა, 3 მოთამაშეზე 7 ფილა, 4 მოთამაშეზე 9 ფილა.
ფილებზე ლაგდება ტომრიდან შემთხვევით ამოღებული 4-4 ქვა.
6 რაუნდის განმავლობაში, ყოველ რაუნდში, 6 ფერის ქვიდან, თითოეული მათგანი რიგრიგობით ხდება „ველური ქვა“ - იგი, საჭიროებისამებრ „იცვლის“ ფერს და ხდება იმ ფერის ქვა, რომელსაც იღებს მოთამაშე.
პირველი მოთამაშის ჟეტონი იდება მაგიდის შუაში და იწყება პირველი რაუნდი.
ქვების შეგროვება შესაძლებელია ორი გზით:
- მოთამაშე ერთი ფილიდან იღებს ყველა ერთი ფერის ქვას, ხოლო დანარჩენ ქვებს დებს მაგიდის შუაში.
- თუ უკვე შეგროვებულია საკმარისი რაოდენობა, მოთამაშე იღებს ქვებს მაგიდის შუა ნაწილიდან ( ყველა ქვას, რომელიც ერთი ფერისაა). პირველი მოთამაშე, ვინც მაგიდის შუა ნაწილიდან აიღებს ქვას, ქულების მაჩვენებელს გადაწევს უკან იმ რაოდენობით, რამდენ ქვასაც აიღებს.
დაფებზე გამოსახულია 7 კრისტალი/ვარსკვლავი. მოთამაშეებმა შეგროვებული ქვები შესაბამის კრისტალზე უნდა გადაიტანონ. ყოველი ფერის ქვას თავისი კრისტალი აქვს, ხოლო მეშვიდე , შუაში განთავსებული კრისტალი, რომელსაც ასევე 6 უჯრა აქვს, უნდა შეივსოს ყოველი ფერის თითო-თითო ქვით.
კრისტალებს 6 უჯრა აქვთ, რომელთაგან თითოეული დანომრილია. მოთამაშე ქვას დებს იმ ნომრის შესაბამის უჯრაზე, რამდენი ქვაც აქვს შეგროვებული ამ ფერში. მაგალითად, მოთამაშემ შეაგროვა 6 იასამნისფერი ქვა. მათი იასამნისფერ კრისტალზე გადატანისას მოთამაშე 1 ქვას დადებს უჯრაზე ნომრით - „6“. თუ უკვე დადებულ ქვას გვერდით კიდევ მიუდებს ქვას, მას დამატებით ქულა ენიჭება. ზემოთ განხილულ შემთხვევაში, ასეთი უჯრა იქნება „5“ ან/და „1“.
თუ მოთამაშე ქვებით შემოღობავს დაფაზე განთავსებულ სვეტს, ქანდაკებასა და ფანჯარას, იგი ბონუს ქულებს იღებს. სვეტი - 1 ქულა, ქანდაკება - 2 ქულა, ფანჯარა - 3 ქულა.
თამაში 6 რაუნდის შემდეგ მთავრდება. მოთამაშე იღებს ბონუს ქულებს ყოველ შევსებულ კრისტალზე.
გამარჯვებული ხდება ის, ვისაც 6 რაუნდის ბოლოს ყველაზე მეტი ქულა ექნება.
