აზული

აზული სამაგიდო თამაშია, სადაც მოთამაშეების მიზანია შექმნან მოზაიკები და ამით დააგროვონ ყველაზე მეტი ქულა.

მოთამაშეებს ურიგდებათ დაფები. იგი შედგება შემდეგი სივრცეებისგან:
1.ქულების მაჩვენებელი სივრცე
2.ქვების შესაგროვებელი სივრცე
3.სასახლის კედელი
4.მინუს ქულების ზოლი
5. ბონუსების სივრცე

მოთამაშე თავის დაფაზე არსებულ ქულების მაჩვენებელს აყენებს 0ზე.

მაგიდაზე იდება ფილები, რომელთა რაოდენობა მოთამაშეთა რაოდენობაზეა დამოკიდებული : 2 მოთამაშეზე 5 ფილა, 3 მოთამაშეზე 7 ფილა, 4 მოთამაშეზე 9 ფილა.

ფილებზე ლაგდება ტომრიდან შემთხვევით ამოღებული 4-4 ქვა.

პირველი მოთამაშის ჟეტონი იდება მაგიდის შუაში და იწყება პირველი რაუნდი.

თითოეულ რაუნდს ორი ეტაპი აქვს:
1. ქვების შეგროვება
2. სასახლის კედლის „მოპირკეთება“

1. ქვების შეგროვება შესაძლებელია ორი გზით:
   - მოთამაშე ერთი ფილიდან იღებს ყველა ერთი ფერის ქვას, ხოლო დანარჩენ ქვებს დებს მაგიდის შუაში.
   - თუ უკვე შეგროვებულია საკმარისი რაოდენობა, მოთამაშე იღებს ქვებს მაგიდის შუა ნაწილიდან. პირველი მოთამაშე, ვინც მაგიდის შუა ნაწილიდან აიღებს ქვას, იღებს პირველი მოთამაშის ჟეტონს და დებს მას თავისი დაფის მინუს ქულების ზოლში.

დაფაზე, ქვების შესაგროვებელ სივრცეში, ხუთი ხაზია. თითოეულ ხაზში კი შესაბამისი რაოდენობის უჯრა ( პირველ ხაზში 1 უჯრა, მეორე ხაზში 2 უჯრა და ა.შ)
ერთ ხაზში იდება მხოლოდ ერთი ფერის ქვები. ასევე, ერთდროულად აღებული ქვები ერთ ხაზში იდება. ასევე, არ შეიძლება ქვა დაიდოს იმ ხაზში, რომლის შესაბამის ხაზშიც, სასახლის კედელზე, უკვე არის ასეთი ფერის ქვა.

2.როცა მაგიდაზე და ფილებზე ქვები აღარ რჩება, იწყება  ქვების შესაგროვებელი სივრციდან კედელზე გადატანა, ანუ კედლის „მოპირკეთება“. კედელზე გადადის იმ ხაზზე არსებული ქვები, რომელი ხაზიც სავსეა ერთნაირი ფერის ქვებით. ერთი გადატანილი ქვა უდრის 1 ქულას. თუმცა, თუ ქვას ჰორიზონტალურად ან ვერტიკალურად ეკვეთება სხვა ქვა, მაშინ იწერება ამ ქვების რაოდენობის შესაბამისი ქულა. ( მაგალითად, მოთამაშემ გადაიტანა ქვა - დაიწერება 1 ქულა. შემდგომ გადაიტანა მეორე ქვა, რომელიც ზუსტად პირველი ქვის დაბლა აღმოჩნდა. დაიწერება 2 ქულა.)

ქულების დაჯამების შემდეგ მოთამაშეს აკლდება ქულები მინუს ქულების ზოლში განთავსებული ქვების მიხედვით.

იწყებ ახალი რაუნდი.

თამაში მთავრდება მაშინ, როდესაც ერთ-ერთი მოთამაშე შეავსებს კედლის 1 ჰორიზონტალურ ხაზს. ასეთ შემთხვევაში მოთამაშეებს ეწერებათ ბონუს ქულები:
ყოველ შევსებულ ჰორიზონტალურ ხაზზე-2 ქულა; ყოველ შევსებულ ვერტიკალურ ხაზზე- 7 ქულა, ყოველი ფერის შესაბამისი უჯრების სრულად შევსება - 10 ქულა.

თამაშს იგებს ის, ვისაც თამაშის დამთავრებისას ყველაზე მეტი ქულა ექნება.